Róberta Michelle Hall blandar saman sirkus og burlesque. Hún hefur húllað í fjölda ára og fann húllinu farveg í gegnum burlesque-ið. Róberta lærði hjá Margréti í Kramhúsinu en kemur núna fram með alls konar hópum: Á Kjallarakabarett í Þjóðleikhús-kjallaranum, Búkalú, og Sðabrók auk þess að vera með eigin mánaðarlegar sýningar á Kiki. Róberta er mikil talskona þess að öll geta eitthvað og miðlar tækninni sinni af leiftrandi húmor og gleði. Hún kemur fram fyrir fullorðna undir nafninu Bobbie Michelle en fyrir fólk á öllum aldri undir nafninu Húllumhæ Húllastelpan.
Róberta sótti húllanámstefnu í Costa Rica á síðasta ári og hefur komið fram í Folkteatern í Gautaborg, Telefonfabrikken í Stokkhólmi, Ravintola Waiski í Helsinki, Rust í Kaupmannahöfn og á Nurse Bettie og Club Cumming í New York.

Margrét hefur starfað sem danskennari í 20 ár í Kramhúsinu og er einn vinsælasti kennari hússins. Jákvæð sjálfsmynd og líkamsvirðing eru höfð að leiðarljósi í tímunum þar sem geðrækt er ekki síður mikilvæg en líkamsrækt.

Margrét hlaut Íslensku dansverðlaunin 2014 sem besti danskennarinn. Hún er skemmtilegur kennari sem útskýrir á aðgengilegan hátt og sérhæfir sig í að kenna byrjendum og fólki sem hefur aldrei dansað áður. Hún var sérstakur danskennari þýska handboltalandsliðs karla í upptakti Evrópumeistaramótsins í handbolta 2016. Árið 2018 var hún í danskórnum í Rocky Horror í Borgarleikhúsinu og er núna í söngleiknum Þetta er Laddi! við sama hús. Margrét hefur farið í fjölda sýningarferðalaga sem burlesquedansmær um Evrópu og Bandaríkin og er fastaskemmtikraftur á hinum goðsagnakennda kabarettstað The Slipper Room í New York.​